Prosjektleiar BuLust

Stillingsinformasjon:

Ønskjer du å vere med på å vidareutvikle bygdene i Luster kommune til eit levande og innovativt samfunn? Me i Luster set i gong BuLust – eit treårig bustad- og tilflyttingsprosjekt for bulyst i Luster, og leitar etter prosjektleiar i 100% stilling som kan utvikle og leie prosjektet.

Om stillinga og prosjektet:

Luster etablerer eit treårig bustad- og tilflyttingsprosjekt som har fått namnet BuLust, ei kortform av bulyst i Luster. Luster har tidlegare hatt vellukka prosjekt med å få omsett både gardsbruk og tomme hus. Dette er erfaring som ein tek med seg inn i det nye prosjektet, men målet er samstundes å tenke heilskapleg på heile kommunen.

Gjennom BuLust er målet å jobbe med:

• Betra tettstadsutvikling
• Få omsett eksisterande bustadmasse som er lite nytta
• Få omsett ledige tomter
• Vurdere om det er marknad for nye bukonsept, eventuelt transformasjon av ledige bygg

Prosjektleiar skal jobbe i samspel med anna utviklingsarbeid, mellom anna Helse og omsorg 2030. BuLust vil og få ansvar for oppfølging av prosjekt samarbeid om bustadutvikling i Luster kommune, som er støtta av Husbanken.

BuLust skal jobbe med delprosjekt og konsept for ulike grupper. og behov. Unge som skal busetje seg og stifte familie i Luster er på utkikk etter noko anna enn seniorar som planlegg for eigen alderdom. For nokon er gardslivet draumen, eller kanskje mikrohus eller mindre leilegheiter med større fellesareal og fellesskap i kvardagen. Nokre ønskjer å busetje seg i ei av bygdene/grendene utan å eige gard, andre ser dei større bygdene med tydelegare sentrumsfunksjonar innan gangavstand, som løysinga på sine bustadbehov.

BuLust vert etablert som eit prosjekt for å fremje busetjing og bulyst i Luster kommune. Gjennom prosjektet er målet å auke busetjinga i heile kommunen, redusere tal tomme hus og marknadsføre bu- og livskvalitetane i Sogn og Luster.

Prosjektleiar vil bli tilsett i ei treårig prosjektstilling, organisert i avdelinga næring og natur, på fagområde næring- og samfunnsutvikling.  

Om avdelinga: Avdelinga næring og natur omfattar fagområda:

• landbruk og naturforvaltning
• verdsarv og kulturarv
• næring- og samfunnsutvikling.

Her har me dedikerte fagansvarlege for kvart område og ein avdelingsleiar som legg til rette for samarbeid og utvikling.

 Arbeidsoppgåver:

• Utarbeide og gjennomføre prosjektplan som bidreg til å nå måla for BuLust
• Bidra til meir heilskapleg innsats for kommunen på bustadfeltet
• Aktiv kontakt og dialog med bygdalag og andre lag og organisasjonar i kommunen
• Samarbeid med relevante nettverk lokalt, regionalt og nasjonalt.
• Bidra i plan- og prosjektprosessar internt
• Samarbeid med Husbanken

Kvalifikasjonar:

• Relevant utdanning 
• Ønskje om dokumentert erfaring og resultat frå prosjektarbeid
• Relevant erfaring frå offentleg og/eller privat sektor
• Personlege eigenskapar vil bli sterkt vektlagt
• Kompetanse/erfaring frå relevant lovverk som plan- og bygningslova, eigedomsjus og landbruk vil kunne telje positivt

Me legg vekt på:

• Gode kommunikasjonsevner
• Gode samarbeidsevner og evne til å arbeide sjølvstendig

Me kan tilby:

• Arbeid i ein veldriven kommune med gode og sikre rammevilkår
• Eit godt og stabilt arbeidsmiljø med høg fagkompetanse
• Gode moglegheiter for fagleg utvikling
• Kommunale tilsetjingsvilkår med gode pensjons- og forsikringsordningar
• Løn etter gjeldande tariff og avtaleverk

Andre opplysningar :

• Administrasjonsmålet i kommunen er nynorsk
• Alle faste nytilsetjingar vert gjort med ei prøvetid på 6 månader
• Me gjer merksam på at i følgje offentleglova § 25, 2. ledd kan opplysningar om søkjaren bli offentleggjort sjølv om du har oppmoda om ikkje å bli ført på offentleg søkjarliste. Dersom du har bedt om unntak frå offentleg søkjarliste vil du alltid bli varsla før søkjarlista vert offentleggjort
• Søknadar må leverast innan fristen og må sendast inn via rekrutteringssystemet vårt EasyCruit
• Grunna ferieavvikling er kontaktperson for stillinga å nå på telefon frå 31.07 og fram til søknadsfrist